Oktubre 1
Miyerkules

Ika-26 na Linggo ng Taon
Teresita ni Jesus

Unang Pagbasa: Job 9:1-12, 14-16
Ebanghelyo: Lc 9:57-62

Habang naglalakad si Jesus at ang kanyang mga alagad, may nagsabi kay Jesus: "Susunod ako sa iyo saan ka man pumunta." At sinabi sa kanya ni Jesus: "May lungga ang mga asong-gubat at may mga pugad ang mga ibon; ang Anak ng Tao nama'y wala man lang mahiligan ng kanyang ulo." At sinabi naman niya sa isa: "Sumunod ka sa akin." Sumagot naman ito: "Pauwiin mo ako para mailibing ko muna ang aking ama." Ngunit sinabi sa kanya ni Jesus: "Hayaan mong ilibing ng mga patay ang kani-lang mga patay; humayo ka naman at ipangaral ang kaharian ng Diyos." Sinabi naman ng isa pa: "Susunod ako sa iyo, Panginoon pero pauwiin mo muna ako para makapagpaalam sa aking mga kasambahay." Sinabi sa kanya ni Jesus: "Hindi bagay sa kaharian ng Diyos ang humahawak ng araro at pagkatapos ay lumilingon sa likuran."

Pagninilay-nilay
Lumaki siyang Aglipay pero nang makilala niya sina Monsenyor Balquiedra at Sister Connie ng Diyosesis ng Lucena, nagpabinyag siyang Katoliko, at pagkaraan ng dalawang taon, nakilala naman niya si Fr. Mañalac ng Diyosesis ng San Pablo, na siyang naging daan para makasama niya sa pagsisimula ng misyon sa Macau si Arnold na ngayo'y isang paring Claretiano. Kung ilang taon din siya sa Macau bilang lay missionary. At pagkatapos ng labintatlong taon, iniwan niya ang kanyang trabaho sa Macau at pamilya sa Pilipinas para maging paring Claretiano. At ngayon nasa Central America si Br. Rey para sa kanyang formation bilang Claretiano.

balik calendario

Oktubre 2
Huwebes

Ika-26 na Linggo ng Taon
Mga Anghel na Tagatanod

Unang Pagbasa: Ex 23:20-23
Ebanghelyo: Mt 18:1-5, 10

Nang panahong iyon, lumapit kay Jesus ang mga alagad at tinanong nila siya: "Sino ang mas una sa kaharian ng Langit?"
Tinawag ni Jesus ang isang maliit na bata at ipinagitna sa kanila, at sinabi: "Sinasabi ko sa inyo na hanggang hindi kayo nagbabago at nagiging katulad ng maliliit na bata hindi kayo makapapasok sa kaharian ng Langit. Ang nagpapakababa gaya ng maliit na batang ito, siya ang pinakamalaki sa kaharian ng Langit. At ang sinumang tumanggap sa batang ito dahil sa aking pangalan ay tumatanggap sa akin.
"Huwag sana ninyong hamakin ang isa sa maliliit na ito; talagang sinasabi ko sa inyo na laging nasa harap ng aking Ama sa Langit ang kanilang mga anghel sa Langit."

Pagninilay-nilay
Iyon ang una kong labas ng Pilipinas at nagpunta ako sa Venezuela para dalawin ang mga Little Brothers of the Gospel pero hindi ko napansin na post office box pala sa Caracas ang address na hawak ko kaya wala akong ibang magagawa kundi ang isa pang address nila ang puntahan. Nasa bundok ang lugar na iyon: apat na oras sa bus ang layo mula Caracas, isang oras sa collective taxi, at kalahating oras na makikisakay sa trak paahon sa bundok. At Kastila ang salita ng mga tao. Pero hindi ako nahirapan dahil sa bawat bahagi ng biyahe, may mga taong padala ng Diyos na parang mga anghel. At nang makisakay ako sa trak paahon sa bundok, isang taga-Venezuela na nakapunta na dito sa atin ang isa sa mga nakasakay!

balik calendario

Oktubre 3
Biyernes

Ika-26 na Linggo ng Taon

Unang Pagbasa: Job 38:1, 12-21; 40:3-5
Ebanghelyo: Lc 10:13-16

Sinabi ni Jesus, "Sawimpalad ka, Corazin! Sawimpalad ka, Betsaida! Kung sa Tiro at Sidon nangyari ang mga himalang ginawa sa inyo, matagal na sana silang nagdamit-sako at naupo sa abo at nakapagbalik-loob. Kaya magaan pa ang sasapitin ng Tiro at Sidon kaysa inyo sa araw ng paghatol. At ikaw naman, Capernaum, dadakilain ka kaya hanggang langit? Hindi! Ibubulid ka sa impiyerno!
"Ang nakikinig sa inyo ay nakikinig sa akin, at ang di-tumatanggap sa inyo ay di-tumatanggap sa akin. At ang di-tumatanggap sa akin ay di tumanggap sa nagsugo sa akin."

Pagninilay-nilay
Madalas nating naiisip na sayang at hindi tayo nabuhay noong panahon ni Jesus para sana nakita natin siya at ang kanyang mga himala. Iniisip din natin na kung tayo ang mga tao noon, hindi sana siya ipinako sa krus dahil tiyak na kikilalanin natin siya bilang Mesiyas at Panginoon. Madaling sabihin ngayon pero bakit ang nagdaang panahon pa ang kailangan nating puntahan para makilala si Jesus? Hindi ba't patuloy na dumarating ang Panginoon sa ating piling kahit na sa kasalukuyang panahon? Pero ganito ang tanong ng marami sa atin: "Kailan ka dumating at hindi namin nakilala?" At kung isa ka sa ganito ang tanong, hindi mo rin nakilala ang Panginoon kahit na dumating siya ngayon.

balik calendario

Oktubre 4
Sabado

Ika-26 na Linggo ng Taon
Francisco ng Asis

Unang Pagbasa: Job 42:1-3, 5-6, 12-17
Ebanghelyo: Lc 10:17-24

Tuwang-tuwang nagbalik ang Pitumpu't da-lawa at ang sabi: "Panginoon, mga demonyo ma'y sumuko sa amin dahil sa iyong pangalan." Sinabi naman ni Jesus: "Nakita kong bumagsak na parang kidlat si Satanas mula sa langit. Binibigyan ko kayo ng kapangyarihang yuma-pak sa mga ahas at alakdan. Masusupil ninyo ang lahat ng kapangyarihan ng kaaway, at wa-lang anumang makapipinsala sa inyo. Subalit magalak kayo hindi dahil sa pagsuko sa inyo ng mga espiritu kundi sapagkat nasusulat sa langit ang inyong mga pangalan."
Nang sandaling iyo'y nag-umapaw sa galak sa Espiritu Santo si Jesus at sinabi niya: "Pinupuri kita, Ama, Panginoon ng langit at lupa, dahil inilihim mo ang mga bagay na ito sa marurunong at matatalino, at ipinamulat mo naman sa maliliit. Oo, Ama, naging kalugud-lugod ito sa iyo. Ipinagkatiwala sa akin ng aking Ama ang lahat. Walang nakakakilala kung sino ang Anak kundi ang Ama, at kung sino ang Ama kundi ang Anak at ang sinumang gustuhing pag-bunyagan ng Anak."
Pagkatapos ay bumaling si Jesus sa mga alagad at sinabi sa kanila nang sarilinan: "Mapalad ang mga matang nakakakita ng inyong nakikita. Sinasabi ko sa inyo na maraming propeta at hari ang nagnais makita ang inyong nakikita pero hindi nila nakita, at marinig ang inyong naririnig pero hindi nila narinig."

Pagninilay-nilay
Pinakapopular na santo si San Francisco ng Assisi at hindi lamang mga Katoliko ang kumikilala sa kanya kundi pati ang mga di-Katoliko at mga di-Kristiyano. Mag-iisanlibong taon na mula nang mabuhay siya pero nananatili pa ring huwaran ng mga Kristiyano ang pagsunod niya kay Jesus.
Nabuhay siya nang simple at pobre sa materyal na bagay, bilang kapatid ng lahat, pati na ni Kapatid Kamatayan na pinatuloy niya sa wakas ng kanyang buhay. Sa kanyang pagsunod sa Ebanghelyo, nadiskubre niya kung paano maging hamak at maliit na bata sa kaharian ng Diyos.
Panginoon, kasangkapanin mo kami para sa iyong kapayapaan.

balik calendario

Oktubre 5
Linggo

Ika-27 na Linggo ng Taon

Unang Pagbasa: Is 5:1-7

Nais kong awitin para sa aking mahal ang awit ng pag-ibig tungkol sa kanyang ubasan. Sa matabang libis ng burol, may ubasan ang aking mahal. Hinukay niya iyon at inalisan ng bato, at tinamnan ng pinakamahusay na mga sanga. Nagtayo siya roon ng bantayan, at humukay ng pisaan ng ubas.
Umasa siyang aani ng ubas, pero wala-mapaklang ubas lamang! Halikayo, mga taga-Jerusalem, at mga kalalakihan ng Juda, hatulan ninyo kami ngayon ng aking ubasan. Ano pa ang puwede kong gawin na di ko ginawa sa aking ubasan?
Umasa akong aani ng ubas, pero wala-mapaklang ubas lamang! Sasabihin ko sa inyo ngayon ang gagawin ko sa aking ubasan: aalisin ko ang bakod niyon, at iyo'y susunugin; gigibain ko ang pader niyon at iyo'y aapak-apakan.

Slm 80:9, 12, 13-14, 15-16, 19-20
Ubasan ng Panginoon ang sambahayan ng Israel.

Ikalawang Pagbasa: Fil 4:6-9

Kaya huwag kayong mabalisa; sa halip ipakita ninyo sa Diyos ang lahat ninyong mga hinihingi sa panalangin at dasal na taglay ang pagpapasalamat. Sa gayon ang kapayapaan ng Diyos, na higit pa sa maiisip ay mag-iingat sa inyong mga puso at isipan kay Kristo Jesus. Bukod dito, mga kapatid, piliin ninyo ang lahat ng totoo, dakila, makatarungan, dalisay, kaibig-ibig at marangal, ang anumang dapat hangaan at purihin. Isagawa ninyo ang inyong natutuhan at natanggap, ang narinig at nakita ninyo sa akin. At sasainyo ang Diyos na mapayapa.

Ebanghelyo: Mt 21:33-43

Makinig kayo sa isa pang halimbawa: May isang may-ari ng bahay na nagtanim ng ubasan; binakuran ang paligid nito, humukay para sa pisaan ng ubas, at nagtayo ng toreng bantayan. Pinaupahan niya ang ubasan sa mga magsasaka at naglakbay sa malayo. Nang malapit na ang panahon ng anihan, pinapunta ng may-ari ang kanyang mga katulong sa mga magsasaka para kubrahin ang kanyang bahagi sa ani. Ngunit sinunggaban ng mga magsasaka ang kanyang mga katulong, binugbog ang isa, pinatay ang iba at binato ang ilan.
Nagpadala uli ang may-ari ng marami pang katulong pero ganoon din ang ginawa ng mga magsasaka sa kanila.
Sa bandang huli, ipinadala na rin niya ang kanyang anak sa pag-aakalang 'Igagalang nila ang aking anak.' Ngunit nang makita ng mga magsasaka ang anak, inisip nilang 'Ito ang tagapagmana. Patayin natin siya at mapapasaatin ang kanyang mana.' Kaya sinunggaban nila siya, at pinalayas sa ubasan at pinatay.
Ngayon, pagdating ng may-ari ng ubasan, ano ang gagawin niya sa mga magsasaka?" Sinabi nila sa kanya: "Hindi niya kaaawaan ang masasamang taong iyon; pupuksain niya ang mga iyon at pauupahan ang ubasan sa ibang magsasakang magbibigay ng kanyang kaparte sa anihan."
At sumagot si Jesus: "Hindi ba ninyo nabasa sa Kasulatan? 'Naging panulukang bato ang tinanggihan ng mga tagapagtayo. Gawa ito ng Panginoon; at kahanga-hanga ang ating nakita.' Kaya sinasabi ko sa inyo: aagawin sa inyo ang kaharian ng Diyos at ibibigay sa isang bayang makapagpapalago nito."

Pagninilay-nilay
Makinig kayo sa isa pang halimbawa: May isang may-ari ng bahay na nagtanim ng ubasan; binakuran ang paligid nito, humukay para sa pisaan ng ubas, at nagtayo ng toreng bantayan. Pinaupahan niya ang ubasan sa mga magsasaka at naglakbay sa malayo. Nang malapit na ang panahon ng anihan, pinapunta ng may-ari ang kanyang mga katulong sa mga magsasaka para kubrahin ang kanyang bahagi sa ani. Ngunit sinunggaban ng mga magsasaka ang kanyang mga katulong, binugbog ang isa, pinatay ang iba at binato ang ilan.
Nagpadala uli ang may-ari ng marami pang katulong pero ganoon din ang ginawa ng mga magsasaka sa kanila.
Sa bandang huli, ipinadala na rin niya ang kanyang anak sa pag-aakalang 'Igagalang nila ang aking anak.' Ngunit nang makita ng mga magsasaka ang anak, inisip nilang 'Ito ang tagapagmana. Patayin natin siya at mapapasaatin ang kanyang mana.' Kaya sinunggaban nila siya, at pinalayas sa ubasan at pinatay.
Ngayon, pagdating ng may-ari ng ubasan, ano ang gagawin niya sa mga magsasaka?" Sinabi nila sa kanya: "Hindi niya kaaawaan ang masasamang taong iyon; pupuksain niya ang mga iyon at pauupahan ang ubasan sa ibang magsasakang magbibigay ng kanyang kaparte sa anihan."
At sumagot si Jesus: "Hindi ba ninyo nabasa sa Kasulatan? 'Naging panulukang bato ang tinanggihan ng mga tagapagtayo. Gawa ito ng Panginoon; at kahanga-hanga ang ating nakita.' Kaya sinasabi ko sa inyo: aagawin sa inyo ang kaharian ng Diyos at ibibigay sa isang bayang makapagpapalago nito."

balik calendario

Oktubre 6
Lunes

Ika-27 na Linggo ng Taon
Bruno

Unang Pagbasa: Gal 1:6-12
Ebanghelyo: Lc 10:25-37

May tumindig na guro ng Batas para subukin si Jesus. Sinabi niya: "Guro, ano ang gagawin ko para makamit ang buhay na walang hanggan?" Sumagot sa kanya si Jesus: "Ano ba ang nasusulat sa Batas, at paano mo ito naiintindihan?" Suma-got ang guro ng Batas: "Mamahalin mo ang Panginoon mong Diyos nang buo mong puso at nang buo mong kaluluwa at nang buo mong lakas at nang buo mong pag-iisip. At nasusulat din naman: Mamahalin mo ang iyong kapwa gaya ng iyong sarili."
Noo'y sinabi ni Jesus sa kanya: "Tama ang sagot mo. Gawin mo ito at mabubuhay ka." Pero gustong mangatwiran ng guro ng Batas kaya sinabi niya kay Jesus: "At sino naman ang aking kapwa?" Sinagot siya ni Jesus: "May taong bumaba mula sa Jerusalem papunta sa Jerico at nahulog siya sa kamay ng mga tulisan. Hinubaran siya ng mga ito at binugbog at saka iniwang halos patay na. Nagkataon namang may paring pababa rin sa daang iyon. Pagkakita sa kanya, lumihis ito ng daan. Gayundin naman, may Levitang napadaan sa lugar na iyon; nang makita siya'y lumihis din ito ng daan.
Pero may Samaritano namang naglalakbay na napadaan sa kinaroroonan niya; pagkakita nito sa kanya, naawa ito sa kanya. Kayat lumapit ito, binuhusan ng langis at alak ang kanyang mga sugat at binendahan. Isinakay nito ang tao sa sarili niyang hayop at dinala sa bahay-panuluyan at inalagaan. Kinabukasan, dumukot ang Samaritano ng dalawang denaryo, ibinigay sa may-ari ng bahay-panuluyan at sinabi: 'Alagaan mo siya; sasagutin ko ang anumang karagdagang gastos pagbalik ko'."
At sinabi ni Jesus: "Sa palagay mo, sino sa tatlong ito ang naging kapwa sa taong nahulog sa kamay ng mga tuli-san?" Sagot ng guro: "Ang nagdalang-habag sa kanya." Kaya sinabi ni Jesus sa kanya: "Humayo ka't ganoon din ang gawin."

Pagninilay-nilay
Naglalakad lang ang mga tao mula sa hangganan ng Macau papuntang Gongbei, na siyang hangganan ng China. Laging puno ng tao ang lugar na iyon dahil maraming mga taga-Macau ang tumatawid para mamalengke, maggudtaym o mamasyal. At dahil maraming tao, marami ring mandurukot. Kadalasa'y mga bata silang sumusunod sa mga taong walang malay na sila ang plano nilang biktimahin. Unti-unti nilang binubuksan ang bag na nasa likod ng kanilang biktima, nang hindi namamalayan ng mga iyon. Kitang-kita naman ng ibang mga tao ang kanilang ginagawa, pero wala ni isa man ang naglalakas-loob na sabihan ang binibiktima na may mandurukot na sumusunod sa kanya.

balik calendario

Oktubre 7
Martes

Ika-27 na Linggo ng Taon
Mahal na Birheng Maria ng Rosaryo

Unang Pagbasa: Gal 1:13-24
Ebanghelyo: Lc 10:38-42

Sa kanilang paglalakbay, pumasok si Jesus sa isang nayon at pinatuloy siya ng isang babaeng nagngangalang Marta. May kapatid siyang babae na tinatawag na Maria. Naupo ito sa may paanan ng Panginoon at nakikinig sa kanyang salita. Abalang-abala naman si Marta sa mga pagsisilbi kaya lumapit siya at sinabi: "Panginoon, hindi mo ba napapansing pinabayaan ako ng aking kapatid na babae na magsilbing mag-isa? Pakisabi mo naman sa kanya na tulungan ako."
Sumagot sa kanya ang Panginoon: "Marta, Marta, abala ka't balisa sa maraming bagay; isa lang naman ang kailangan. Pinili nga ni Maria ang mainam na bahagi na hindi kukunin sa kanya."

Pagninilay-nilay
Noong maliliit pa kami, malaking handaan taun-taon ang piyesta ng aming bayan. Buong bisperas na paghahanda at pagluluto ng iba't ibang putahe para sa araw ng kapistahan, lalo na kung patay-baboy. May dinuguan, adobo, asado, menudo, pininyahang manok, pastel, lumpia, biringhi, gulaman, at kung anu-ano pang espesyal na pagkain. Bising-bisi ang lahat sa paghahanda at tuloy pa rin ang pagluluto hanggang sa araw ng piyesta. Kaya naman wala nang panahong magsimba ang mga tao dahil abalang-abala sila.
Hindi lamang paghahanda ng pagkain ang pagpipiyesta kundi araw din ito ng pasasalamat sa Diyos.

balik calendario

Oktubre 8
Miyerkules

Ika-27 na Linggo ng Taon

Unang Pagbasa: Gal 2:1-2, 7-14
Ebanghelyo: Lc 11:1-4

Isang araw, nananalangin si Jesus sa isang lugar at pagkatapos niya'y sinabi sa kanya ng isa sa kanyang mga alagad: "Panginoon, turuan mo kaming manalangin kung paanong tinuruan ni Juan ang kanyang mga alagad." At sinabi ni Jesus sa kanila: "Kung mananalangin kayo, sabihin ninyo:
Ama, sambahin ang ngalan mo, dumating ang kaharian mo, bigyan mo kami araw-araw ng pagkaing kailangang-kailangan namin, pa-tawarin mo kami sa aming mga sala; tingnan mo't pinatatawad din namin ang lahat ng may utang sa amin, at huwag mo kaming dalhin sa tukso."

Pagninilay-nilay
Humanap ka ng tahimik at komportableng lugar. Maupo, pumikit at magrelax. Ipatong mo ang iyong mga kamay sa iyong mga hita; nakatihaya ang mga palad. Naririnig mo ang ingay sa paligid pero hindi para bigyang-pansin. Hayaan mo lang. Pakiramdaman mo ang iyong pagkakaupo.
Pagdikitin mo ngayon ang iyong hinlalaki at hintuturo. Pakiramdaman mo ang pagkakadikit nito. Ang Diyos Ama ang hinlalaki at ikaw naman ang hintuturo. Pakiramdaman mo na may buhay ka dahil idinikit ng Ama ang kanyang sarili sa iyo. Huwag mag-isip kundi makiramdam. Manatili sa damdaming ito sa loob ng 15 minuto o hanggang gusto mo.

balik calendario

Oktubre 9
Huwebes

Ika-27 na Linggo ng Taon
Dionisio at mga Kasama, Juan Leonardo

Unang Pagbasa: Gal 3:1-5
Ebanghelyo: Lc 11:5-13

Sinabi ni Jesus sa kanyang mga alagad, "Ipalagay nating may kaibigan ang isa sa inyo at pinuntahan mo siya sa hatinggabi at sinabi: 'Kaibigan, pahiram nga ng tatlong pirasong tinapay dahil kararating lang mula sa biyahe ng isa kong kaibigan at wala akong maihain sa kanya.' At sasagutin ka siguro ng nasa loob: 'Huwag mo na akong gambalain. Nakatrangka na ang pinto at nakahiga na kami ng mga bata; hindi na ako maaaring tumayo para bigyan ka.' Sinasabi ko sa inyo, kung hindi man siya bumangon para magbigay dahil sa pakikipagkaibigan, babangon pa rin siya at ibibigay sa iyo ang lahat mong kailangan dahil sa pagpupumilit sa kanya.
"Kaya sinasabi ko sa inyo: humingi at kayo'y bibigyan, maghanap at matatagpuan ninyo, kumatok at bubuksan ang pinto para sa inyo. Talaga ngang tumatanggap ang humihingi, nakakatagpo ang naghahanap at pinagbubuksan ang kumakatok.
"Sino sa inyo ang amang magbibigay ng ahas sa kanyang anak kung isda at hindi ahas ang hinihingi nito? Sino ang magbibigay ng alakdan kung itlog ang hinihingi? Kaya kung kayo mang masasama'y marunong magbigay ng mabubuting kaloob sa inyong mga anak, gaano pa kaya ang Ama mula sa langit? Tiyak na ibibigay niya ang banal na Espiritu sa mga hihingi sa kanya."

Pagninilay-nilay
May pinagbigyan ka na bang humihingi sa iyo dahil sa inis? Napakakulit nila at paulit-ulit na lumalapit sa iyo para sa kanilang pakay. At para matigil na lamang, wala kang ibang magagawa kundi pagbigyan sila.
Kung sa kabila ng ating pagkainis ay napipilitan tayong pagbigyan at pagmagandahang-loob ang nakikiusap sa atin, gaano pa ang Diyos na pawang kagandahang-loob. Hindi ka magdadalawang-salita na ipagkakaloob sa iyo ng Diyos ang hinihiling mo sa kanya.
Walang anumang pagkainis sa Diyos kayat manalig tayo sa kanyang kagandahang-loob.

balik calendario

Oktubre 10
Biyernes

Ika-27 na Linggo ng Taon

Unang Pagbasa: Gal 3:7-14
Ebanghelyo: Lc 11:15-26

Nang makapagpalayas si Jesus ng demonyo, sinabi ng ilan sa mga tao, "Pinalalayas niya ang mga ito sa tulong ni Beelzebul na pinuno ng mga demonyo." Gusto naman ng iba na subukin si Jesus at humingi sila sa kanya ng isang tanda galing sa langit.
Alam ni Jesus ang kanilang iniisip kaya sinabi niya sa kanila: "Mabubuwag ang bawat kahariang nagkakahati-hati at magigiba roon ang mga sambahayan. Ngayon, kung nagkakahati-hati si Satanas, paano magtatagal ang kanyang kaharian? Di nga ba't sinasabi ninyo na nagpapalayas ako ng mga demonyo sa tulong ni Beelzebul? Kung sa pamamagitan ni Beelzebul ako nagpapalayas ng mga demonyo, paano naman napalalayas ng inyong mga kaanib ang mga ito? Sila mismo ang nararapat sumagot sa inyo.
"Sa daliri ng Diyos ako nagpapalayas ng mga demonyo kaya sumapit na sa inyo ang kaharian ng Diyos. Kung sandatahang binabantayan ni Malakas ang kanyang palasyo, hindi magagambala ang kanyang mga pag-aari. Pero kung salakayin siya ng mas makapangyarihan sa kanya at talunin siya, maaagaw nito ang kanyang mga armas na kanyang inasahan at ipamamahagi ang kanyang mga ari-arian.
"Ang hindi panig sa akin ay laban sa akin, at ang hindi nagtitipong kasama ko ay nagpapangalat.
"Kapag lumabas sa tao ang maruming espiritu, nagpapalabuy-laboy ito sa mga lugar na walang tubig sa paghahanap ng pahingahan. Pero wala siyang natatagpuan at sinasabi niya: 'Babalik ako sa inalisan kong tirahan.' Pagdating niya, natatagpuan niya ito na nawalisan na at maayos pa. Kaya naghahanap siya at nagsasama ng pito pang espiritung mas masama pa kaysa kanya; pumapasok ang mga ito at doon tumitira. Kaya mas masama ang huling kalagayan ng taong iyon kaysa dati."

Pagninilay-nilay
Larawan ng kapangyarihan ng Diyos ang mga katagang "sa daliri ng Diyos." Hindi ito literal na daliri ng Diyos kundi ang lakas at kapangyarihan ng Diyos ang tinutukoy nito.
Hindi lamang sa malalaking himala gumagawa ang daliri ng Diyos kundi maging sa karaniwang takbo ng ating buhay sa araw-araw. At makikita natin na ang Diyos nga ang gumagawa sa ating buhay kung magiging mulat ang ating mga mata at kalooban sa pagmamagandang-loob ng Diyos.
Imulat mo, Panginoon, ang aming mga mata at buksan ang aming kalooban upang makita kang patuloy na gumagawa sa aming buhay.

balik calendario

Oktubre 11
Sabado

Ika-27 na Linggo ng Taon

Unang Pagbasa: Gal 3:22-29
Ebanghelyo: Lc 11:27-28

Habang nagsasalita pa si Jesus, may babae mula sa dami ng tao na malakas na nagsabi sa kanya: "Mapalad ang nagdala sa iyo sa kanyang sinapupunan at nagpasuso sa iyo." Ngunit sumagot si Jesus: "Kaya talagang mapalad ang mga nakikinig sa salita ng Diyos at tumutupad nito."

Pagninilay-nilay
Maria, boses mo ang unang narinig ni Jesus habang nasa sinapupunan mo siya. Ikaw ang naging Tahanan ng Diyos sa daigdig at sa iyo rin nagmula ang katawan ng kanyang pagkatao. Sa pagbabalita ng anghel sa iyo, dininig mo at pinatuloy ang Salitang inialok sa iyo ng Diyos. Mapalad ka, O Ina ng Diyos, dahil dininig mo at tinupad ang Salita ng Diyos.
Turuan mo kaming makinig din sa kanyang Salita nang buong puso. Maipagpatuloy nawa namin at madala sa aming buhay ang Salita upang maisilang namin siyang muli. Akayin mo kami sa matuwid na landas ng pagsunod sa iyong Anak, na si Jesus.

balik calendario

Oktubre 12
Linggo

Ika-28 na Linggo ng Taon

Unang Pagbasa: Is 25:6-10a

Sa bundok na ito ihahanda ni Yawe ng mga Hukbo ang isang piging para sa lahat ng bayan sagana sa pagkain, pili ang alak.
Sa bundok na ito niya sisirain ang belo ng pagluluksa ng lahat ng bayan, ang talukbong na bumabalot sa lahat ng bansa, at wawasakin niya ang Kamatayan mag-pakailanman.
Papahirin ni Yaweng Panginoon ang luha sa lahat ng mukha, papawiin niya ang kahihiyan ng kanyang bayan at ng buong daigdig-Ito ang sabi ni Yawe.
Sa araw na iyon, sasabihin nila: "Ito nga ang aming Diyos na aming hinihintay na sa ami'y magliligtas; ito si Yawe na ating inaasahan.
Magalak tayo ngayon at magsaya sa kanyang pagliligtas sapagkat sa bundok na ito mananatili ang kamay ni Yawe.

Slm 23:1-3a, 3b-4, 5, 6
Maninirahan ako sa bahay ng Panginoon magpakailan man.

Ikalawang Pagbasa: Fil 4:12-14, 19-20

Nahaharap ko ang karalitaan at ang kasaganaan; handa ako sa lahat ng bagay; sanay ako sa kabusugan at gutom, sa pagsasawa at kakulangan. Kaya ko ang lahat sa tulong ng nagpapalakas sa akin. Gayunman, mabuti ang ginawa ninyo sa pakikibahagi sa aking kapighatian.
Kaya bibigyang-kasiyahan kayo ng aking Diyos sa lahat ng inyong kailangan, ayon sa kanyang kayamanan, nang buong kagandahang-loob, kay Kristo Jesus. Luwalhatiin ang Diyos na ating Ama magpakailanman! Amen.

Ebanghelyo: Mt 22:1-14

Muling nagsalita si Jesus sa pamamagitan ng mga talinhaga:
"Tungkol sa nangyayari sa kaharian ng Langit ang kuwentong ito: May haring naghanda sa kasal ng kanyang anak na lalaki. Ipinatawag niya sa mga katulong ang mga imbitado sa kasalan ngunit ayaw nilang dumalo.
"Muli niyang pinapunta ang iba pang mga katulong para sabihin sa mga inanyayahan sa kasalan: 'Naghanda ako ng pagkain, nagpatay ng mga toro at mga pinatabang hayop; handa na ang lahat kaya pumarito na kayo sa kasalan.' Ngunit hindi nila pinansin ang paanyaya, sa halip ay may pumunta sa kanyang taniman, at sa kanyang negosyo naman ang isa pa. Si-nunggaban naman ng iba pa ang mga katulong ng hari, nilibak at pinatay.
"Lubhang nagalit ang hari kayat ipinadala niya ang kanyang hukbo para puksain ang mga mamamatay-tao at sunugin ang lunsod. At sinabi niya sa kanyang mga katulong: 'Handa na ang kasalan ngunit hindi karapat-dapat ang mga inanyayahan. Pumunta kayo ngayon sa dulo ng lunsod at anyayahan sa kasalan ang bawat makita ninyo.'
"Kaya agad na lumabas sa mga daan ang mga katulong at tinipon ang lahat ng makita, masama at mabuti, at napuno ang kasalan ng mga nasa hapag.
"Pagkatapos ay dumating ang hari para tingnan kung sino ang mga nasa hapag at napansin niya ang isang lalaking hindi nakadamit-pampiyesta. Kaya sinabi niya sa kanya: 'Kaibigan, paano ka nakapasok nang walang damit pangkasal?' Ngunit hindi umimik ang tao. Kaya sinabi ng hari sa kanyang mga katulong: 'Igapos ang kanyang mga kamay at paa, at itapon sa dilim, kung saan may iyakan at pagngangalit ng mga ngipin.'
"Marami ngang talaga ang tinawag pero kaunti ang pinili."

Pagninilay-nilay
Kasal. Sa pag-iisandibdib ng dalawang taong nagmamahalan, ipinangangako nila ang pag-aalay ng sarili at pananatili nilang tapat sa isa't isa. Sa kanilang pag-aasawa, nagiging bahagi ng buhay ng bawat isa ang kanyang kabiyak tungo sa pagsisimula nila ng kanilang pamilya.
Kasal din ang malimit na ginagamit sa Biblia para ilarawan ang relasyon ng Diyos at ng kanyang bayan. At sa kabila ng katapatan ng Diyos, naging taksil naman at salawahan ang kanyang bayan. Kasal din ang talinhagang ginagamit ni Jesus para ilarawan ang Kaharian ng Diyos. Sa kasalang iyon, lubos na ibinubunyag ng Diyos ang alok niyang buhay at pag-ibig sa tao.

balik calendario

Oktubre 13
Lunes

Ika-28 na Linggo ng Taon

Unang Pagbasa: Gal 4:22-24, 26-27, 31-5:1
Ebanghelyo: Lc 11:29-32

Nang dumadagsa na ang mga tao, nag-simulang magsalita si Jesus: "Masamang lahi ang lahing ito; humihingi ito ng palatandaan pero walang ibang palatandaang ibibigay rito kundi ang palatandaan ni Jonas. At kung paanong naging palatandaan si Jonas para sa mga taga-Ninive, gayundin naman ang Anak ng Tao para sa mga tao sa kasalukuyan. Sa paghuhukom, babangon ang Reyna ng Timog kasama ng mga lalaki ng lahing ito at hahatulan sila. Sapagkat dumating siya mula sa kabilang dulo ng mundo para masaksihan ang karunungan ni Solomon at dito'y may mas dakila pa kay Solomon. Sa paghuhukom, babangon ang mga lalaking taga-Ninive kasama ng salinlahing ito at hahatulan nila ito dahil nagbalik-loob sila sa pangangaral ni Jonas; at dito'y may mas dakila pa kay Jonas."

Pagninilay-nilay
Mga taong hindi kabilang sa bayan ng Israel ang tinutukoy at pinupuri ni Jesus sa kanyang mga salita. Umalis sa sariling bayan ang Reyna ng Timog at nagpunta sa Israel para marinig ang karunungan ni Solomon. Sa simula'y ayaw magpunta ni Jonas sa Ninive para ipangaral sa mga tagaroon, na hindi naman niya mga kababayan, ang magbabalik-loob sa Panginoon. Gayundin naman sa atin ngayon, huwag nating isipin na sapat na maging Katoliko para maligtas; wala sa pangalan ang pagiging alagad ng Panginoon. Regalo sa atin ng Diyos ang makilala siya at sumunod sa kanya ngunit sa pagtanggap natin sa kaloob niyang ito, kailangan nating isabuhay ang ating pananampalataya.

Oktubre 14
Martes

Ika-28 na Linggo ng Taon
Calixto I

Unang Pagbasa: Gal 5:1-6
Ebanghelyo: Lc 11:37-41

Matapos magsalita si Jesus, may Pariseong nag-anyaya sa kanyang kumain sa bahay nito. Pumasok siya at dumulog sa hapag. At nagtaka ang Pariseo nang makitang hindi muna siya naghugas ng kamay bago kumain. Ngunit sinabi sa kanya ng Panginoon: "Kayong mga Pariseo, ugali ninyong linisin ang labas ng mga baso't pinggan pero nag-uumapaw naman sa kasakiman at kasamaan ang inyong loob! Mga hangal! Di ba't ang maygawa ng labas ang siya ring maygawa ng loob? Pero naglilimos lamang kayo at sa akala ninyo'y malinis na ang lahat."

Pagninilay-nilay
Manang ng simbahan si Sister Lucy. Bukod sa siya ang namamahala sa pagdedekorasyon ng simbahan kung may malaking pagdiriwang, miyembro pa rin siya ng iba't ibang samahan. Kung ilang beses na rin siyang nahahalal na presidente ng ilang samahan. At wala naman siyang anumang hinihingi para sa kanyang paglilingkod dahil para sa kanya, sapat na ang siya'y makapagsilbi sa Panginoon. Ngunit kung gaano naman siya kabait sa simbahan, ganoon naman siya kasungit pagdating sa bahay. Reyna siya ng taray lalo na sa kanyang mga katulong, na hindi naman makaalis sa pagsisilbi sa kanya dahil marami pang utang kay Sister Lucy ang kanilang mga magulang.

balik calendario

Oktubre 15
Miyerkules

Ika-28 na Linggo ng Taon
Teresa ni Jesus

Unang Pagbasa: Gal 5:18-25
Ebanghelyo: Lc 11:42-46

Sinabi ni Jesus, "Sawimpalad kayong mga Pariseo! Nagbabayad nga kayo ng ikapu ng yerbabuena at ng ruda at ng lahat ng gulay, at pinababayaan naman ninyo ang katarungan at ang pag-ibig sa Diyos. Ito nga ang dapat gawin nang di kinaliligtaan ang mga iyon. Sawimpalad kayong mga Pariseo! Gusto ninyong mabigyan ng pangunahing upuan sa mga sinagoga at mabati sa mga liwasan. Sawimpalad kayo, na parang mga nakatagong libingan, na inaapakan ng mga tao at di man lang nila namamalayan."
Nagsalita ang isang guro ng Batas: "Guro, iniinsulto mo rin kami sa pagsasabi mo ng mga ito." At sinabi ni Jesus: "Sawimpalad din kayong mga guro ng Batas! Ipinapapasan ninyo sa mga tao ang mga napakabibigat na pasanin, ngunit ni isang daliri ay ayaw ninyong igalaw para tulungan sila."

Pagninilay-nilay
Libreng regalo sa atin ng Diyos ang pananampalataya. Tinawag tayo ng Diyos at ibinigay niya sa atin ang regalong ito ng kaligtasan at wala siya hinihinging anumang kapalit. Ngunit hindi tayo makapaniwala sa kagandahang-loob na ito ng Diyos. Paano tayo maliligtas nang walang anumang ginagawa? Paano tayo mapapatawad ng Diyos sa marami nating pagkakasala kung wala siyang hinihingi sa atin? Kaya tayo mismo ang naglalagay ng kung anu-anong kundisyon sa ating mga sarili na hindi naman hinihingi ng Diyos sa atin ngunit ginagawa natin iyon dahil kailangan nating madama na meron nga tayong ginawa. Tandaan natin: hindi gawa ng tao ang pagliligtas kundi regalo ito ng Diyos.

Oktubre 16
Huwebes

Ika-28 na Linggo ng Taon
Hedwig at Margarita Maria Alacoque

Unang Pagbasa: Ef 1:1-10
Ebanghelyo: Lc 11:47-54

Sinabi ni Jesus, "Sawimpalad kayong nagta-tayo ng mga puntod sa mga propetang pinatay ng inyong mga ama. Sa gayon ninyo inaamin at sinasang-ayunan ang mga ginawa ng inyong mga ama; iniligpit nila ang mga propeta, at makapagtatayo na kayo ngayon.
"(Sinabi rin ng Karunungan ng Diyos:) Nag-susugo ako sa kanila ng mga propeta at mga apostol ngunit uusigin nila at papatayin ang ilan sa kanila. Kayat papapanagutin ang salinlahing ito sa dugo ng lahat ng propeta, sa dugong nabuhos mula pa sa pagkatatag ng mundo, mula sa dugo ni Abel hanggang sa dugo ni Zacarias na nasawi sa pagitan ng altar at ng santuwaryo. Oo, sinasabi ko sa inyo, papapanagutin ang salinlahing ito.
"Sawimpalad kayong mga guro ng Batas na umagaw sa susi ng kaalaman. Hindi na kayo pumasok at hinadlangan pa ninyo ang mga makapapasok."
Pagkatapos ay umalis si Jesus at sinimulan naman ng mga guro ng Batas at mga Pariseo na mahigpit na makipagtalo sa kanya. Pinapagsalita nila siya tungkol sa maraming bagay at pilit na sinisilo sa anumang sinasabi niya.

Pagninilay-nilay
Pinag-aralan natin sa elementarya hanggang hayskul, at pati na sa kolehiyo, ang talambuhay ng ating mga bayani. Marami rin sa atin ang nakiisa, kung hindi man talagang kasama, sa People Power 1 at 2, pero sa kabila ng lahat ng kabayanihang alam natin at naranasan din natin mismo bilang sambayanan, nananatiling kulang sa pagpapakabayani ang sambayanang Pilipino.
Hindi lamang sa pamamagitan ng pagpapakamartir para sa kalayaan tulad nina Rizal, Bonifacio at Gregorio del Pilar ang pagiging bayani. Nasa paninindigan at katapatan sa ating mga tungkulin sa buhay sa araw-araw ang tunay na kabayanihan.

Oktubre 17
Biyernes

Ika-28 na Linggo ng Taon
Ignacio ng Antioquia

Unang Pagbasa: Ef 1:11-14
Ebanghelyo: Lc 12:1-7

Nang magkatipon ang libu-libong tao hang-gang magkatapakan na sila, sinimulang sabihin ni Jesus sa kanyang mga alagad: "Mag-ingat muna kayo sa lebadura ng mga Pariseo, na walang iba kundi ang pagkukunwari.
"Walang tinatakpan na di mabubunyag, wa-lang natatago na di malalaman. Kaya naman ang sinabi ninyo sa dilim, sa liwanag maririnig; at ang ibinulong ninyo sa mga kuwarto, sa bubungan ipahahayag.
"Sinasabi ko naman ito sa inyo na mga kaibigan ko: huwag ninyong katakutan ang mga nakapapatay sa katawan at wala nang magagawa pa. Ituturo ko sa inyo kung sino ang dapat ninyong katakutan: matakot kayo sa may kapangyarihang pumatay at may kapangyarihan pang magbulid sa impiyerno. Oo, sinasabi ko sa inyo, ito ang katakutan ninyo. Di ba't ipinagbibili nang dalawang pera ang limang maya? Subalit isa man sa kanila'y di nalilimutan ng Diyos. Bilang na pati ang lahat ng buhok sa inyong ulo. Huwag kayong matakot; mas mahalaga pa kayo kaysa maraming maya."

Pagninilay-nilay
Humigit-kumulang sa 100,000 hanggang 150,000 buhok meron tayo sa ating ulo. Inaalagaan natin ang ating buhok: sinasyampu, kinukondisyuner, at ginagamitan natin ng kung anu-ano pang mga pampaganda sa buhok. Kinukulayan din ng ilan sa atin ang kanilang buhok kaya may pula, brown, at meron pang dilaw, berde at asul. Bukod dito, regular din tayong pumupunta sa barbero o parlor para magpagupit at magpaayos ng ating buhok. Pagharap natin sa salamin, nakikita natin na maganda kung may buhok tayo (para naman sa iba, mas maganda ang tingin nila sa sarili kung wala silang buhok). At bilang na lahat ng Diyos ang buhok sa ating ulo…

Oktubre 18
Sabado

Ika-28 na Linggo ng Taon
Lucas

Unang Pagbasa: 2 Tim 4:10-17b
Ebanghelyo: Lc 10:1-9

Humirang ang Panginoon ng iba pang pitumpu't dalawa at isinugo silang dala-dalawa na mauna sa kanya sa bawat bayan at lugar na takda niyang puntahan. Sinabi niya sa kanila: "Marami nga ang aanihin at kakaunti naman ang mga manggagawa; idalangin ninyo sa panginoon ng ani na magpadala siya ng mga manggagawa sa kanyang ani. Lumakad na kayo. Isinusugo ko kayong parang mga tupa sa gitna ng mga asong-gubat. Huwag kayong magdala ng pitaka, bag o mga sandalyas. At huwag ninyong batiin ang sinuman sa daan.
"Saanmang bahay kayo pumasok, sabihin muna ninyo: 'Mapasatahanang ito ang kapayapaan!' Kung mapayapang tao ang naroon, sasakanya ang inyong kapayapaan. Kung hindi'y magbabalik sa inyo ang inyong dasal. At sa bahay na iyon kayo manatili; kumain kayo at uminom na kasalo nila sapagkat may karapatan ang manggagawa sa kanyang sahod. Huwag kayong magpapapalit-palit ng bahay.
Saanmang bayan kayo pumasok at tanggapin nila kayo, kanin ninyo anumang ihain sa inyo. Pagalingin din ninyo ang mga maysakit doon at sabihin ninyo sa kanila: 'Palapit na sa inyo ang kaharian ng Diyos.'"

Pagninilay-nilay
Parehong maghapong nagtatrabaho ang mag-asawang Joe at Nena habang pumapasok naman sa eskuwela ang dalawa nilang anak. Pero pagkatapos ng trabaho ni Joe, sinusundo niya si Nena sa opisinang pinagtatrabahuhan nito para sabay nilang sunduin ang dalawa nilang anak. Pupunta sila sa isang restawran para maghapunan, at kung minsa'y may baon nang hapunan si Nena para sa sasakyan sila kumain. Ganoon ang malimit na gawa ng buo nilang mag-anak dahil may parokya silang pinupuntahan para magturo at magpahayag ng Salita ng Diyos. Kapwa nagtuturo ang mag-asawang Joe at Nena habang ang dalawa nilang anak ang nagtuturo ng mga kanta kasabay ng kanilang paggitara.

Oktubre 19
Linggo

Ika-29 na Linggo ng Taon

Unang Pagbasa: Is 45:1, 4-6

Ito ang sabi ni Yawe sa kanyang pinahiran, kay Ciro:
"Hinawakan kita sa kanang kamay
upang lupigin ang mga bansa sa harap mo
at alisan ng sandata ang mga hari;
bubukas sa harap mo ang mga pintuan ng mga lunsod
at hindi na isasarang muli ang mga iyon.
Alang-alang kay Jacob na aking lingkod,
kay Israel na aking hinirang,
tinawag kita sa iyong pangalan
at binigyan ng tungkulin bagamat di mo ako nakikilala.
Ako si Yawe, at wala nang iba pa,
wala nang ibang diyos liban sa akin,
Sinandatahan kita noong di mo pa ako kilala upang mula sa pagsikat ng araw
hanggang sa paglubog ay malaman ng lahat
na wala nang iba pa liban sa akin-
ako si Yawe at wala nang iba pa.

Slm 96:1, 3, 4-5, 7-8, 9-10
Purihin at ipagdangal ang Panginoon.

Ikalawang Pagbasa: 1 Tes 1:1-5b

Mula kina Pablo, Silvano at Timo-teo para sa Iglesya ng mga taga-Tesalonika na nasa Diyos Ama at na kay Kristo Jesus.
Sumainyo nawa ang kapayapaan at kagan-dahang-loob ng Diyos.
Lagi kaming nagpapasalamat sa Diyos dahil sa inyo at inaalaala namin kayo sa aming mga panalangin. Palagi naming naaalaala sa harap ng Diyos na ating Ama ang trabaho ng inyong pananampalataya, ang gawa ng inyong pagmamahal at ang inyong katatagan sa paghihintay kay Kristo Jesus na ating Panginoon.
Naaalaala namin, mga kapatid na mahal ng Diyos, kung paano kayo hinirang. Hindi nga sa salita lamang ang pag-eebanghelyo namin sa inyo, kundi sa kapangyarihan, nang may banal na espiritu at marami pang ibang ibinigay sa inyo. Alam din ninyo kung paano namin kayo pinakitunguhan alang-alang na rin sa inyo.

Ebanghelyo: Mt 22:15-21

Umurong ang mga Pariseo at nagpulong kung paano nila huhulihin si Jesus sa sarili niyang mga salita. Kaya ipinadala nila ang kanilang mga alagad kasama ng mga kampi kay Herodes.
Sinabi nila kay Jesus: "Guro, nalalaman namin na tapat kang tao at tunay na nagtuturo ng daan ng Diyos; hindi ka napadadala sa iba at nagsasalita hindi ayon sa kalagayan ng tao. Kaya ano ang palagay mo: ayon ba sa Batas na magbayad ng buwis sa Cesar? Dapat ba tayong magbayad sa kanya o hindi?"
Alam naman ni Jesus ang masama ni-lang pakay, at sinabi niya sa kanila: "Mga mapagkunwari! Bakit ninyo ako sinusubukan? Ipakita ninyo sa akin ang perang pambuwis."
Ipinakita nila ang isang denaryo, at sinabi sa kanila ni Jesus: "Sino ang nakalarawan dito, na narito rin ang kanyang pangalan?" Sumagot sila: "Ang Cesar." At sinabi niya sa kanila: "Kung gayon, ibigay sa Cesar ang para sa Cesar, at sa Diyos ang para sa Diyos."

Pagninilay-nilay
Tanong. Nagtatanong tayo kung meron tayong hindi alam kayat naghahanap tayo ng makasasagot sa ating tanong. Tanda ng kapakumbabaan ang pagtatanong dahil inaamin natin na may mga bagay na hindi natin alam at kailangan tayong humingi ng tulong sa ating kapwa para malaman ito.
Ngunit may pagtatanong na sa totoo'y hindi sagot ang hinahanap dahil alam na ng nagtatanong ang sagot sa kanyang tanong. Sa halip na kapakumbabaan, pagmamataas ang pinatutunayan ng ganitong tanong dahil ito ang kinakasangkapan ng nagtatanong para ipakitang tama ang alam niyang sagot at mali ang sa tinatanong.

balik calendario

Oktubre 20
Lunes

Ika-29 na Linggo ng Taon

Unang Pagbasa: Ef 2:1-10
Ebanghelyo: Lc 12:13-21

Sinabi kay Jesus ng isa sa karamihan, "Guro, sabihin mo nga sa aking kapatid na hatian ako ng mana." Ngunit sinabi ni Jesus sa kanya: "Kaibigan, sino ang nagtalaga sa akin bilang hukom o tagapaghati ninyo?" At sinabi niya sa mga tao: "Mag-ingat kayo at iwasan ang bawat uri ng kasakiman sapagkat magkaroon man ng marami ang tao, hindi sa kanyang mga ari-arian nakasalalay ang kanyang buhay."
At idinagdag ni Jesus ang isang talinhaga: "May isang taong mayaman na maraming tinubo sa kanyang lupain. Kaya nag-isip-isip siya: 'Ano ang gagawin ko? Wala man lang akong mapagtipunan ng aking ani.' At sinabi niya: 'Ito ang gagawin ko, gigibain ko ang aking mga bodega at magtatayo ako ng mas malalaki; doon ko titipunin ang lahat kong trigo at ang iba pa. At masasabi ko na sa aking sarili: Kaibigan, marami kang ari-ariang nakalaan para sa maraming taon. Magpahinga ka, kumain, uminom at magsaya.'
"Ngunit sinabi sa kanya ng Diyos: 'Hangal! Sa gabi ring ito, babawiin sa iyo ang iyong buhay. Mapapasakanino na ang iyong inihanda?'
"Gayon din ang masasabi sa sinumang nag-iimpok ng yaman para sa kanyang sarili at walang tinutubo para sa Diyos."

Pagninilay-nilay
Basahin mong muli ang talinhaga ni Jesus at itanong ang mga sumusunod: Ano ang masama sa ginawa ng mayaman? Masama ba ang magtayo ng bagong bodega para sa masagana niyang ani? Pansinin na hindi sinasabing sa paggawa ng masama kaya siya yumaman. Hindi siya negosyante kundi magsasaka at marami siyang inani sa kanyang lupain bunga ng kanyang sipag at tiyaga.
Wala namang masama na ienjoy mo ang bunga ng iyong pinagpaguran, di ba?
Bakit sinasabi ni Jesus na hangal ang mayamang ito? Bakit niya sinasabing walang tinutubo ang mayaman para sa Diyos?
Paano ka may tutubuin para sa Diyos?

balik calendario

Oktubre 21
Martes

Ika-29 na Linggo ng Taon

Unang Pagbasa: Ef 2:12-22
Ebanghelyo: Lc 12:35-38

Sinabi ni Jesus sa kanyang mga alagad, "Maghintay kayong bihis at handang maglingkod, na may nakasinding mga lampara. Maging tulad kayo ng mga taong naghihintay sa kanilang panginoon. Pauwi siya mula sa kasalan at agad nilang mabubuksan ang pinto pag dating niya at pag katok. Mapalad ang mga lingkod na iyon na matatagpuang naghihintay sa panginoon pagdating niya. Maniwala kayo sa akin, isusuot niya ang damit pantrabaho at pauupuin sila sa hapag at isa-isa silang pagsisilbihan. Dumating man siya sa hatinggabi o sa madaling-araw at matagpuan niya silang ganito, mapalad ang mga iyon!"

Pagninilay-nilay
Hindi ang mga utusan ang maglilingkod sa panginoon kundi sila ang pagsisilbihan ng kanilang panginoon kung madaratnan niya silang nakabihis, handang maglingkod at may hawak na mga ilawan.
Walang sinuman sa atin ang nakaaalam kung kailan darating ang Diyos sa ating buhay. Wala ring may alam kung kailan tayo darating sa piling ng Diyos. Isa lang ang natitiyak natin-talagang darating ang oras na iyon. Hindi natin maaaring ipagpabukas na lamang lagi ang pagbabalik-loob at paglilingkod sa Diyos. Sa halip na "saka na lang muna," pag-aralan nating sabihin, "Oo, ngayon na" dahil dito at ngayon nagsisimula ang pagliligtas ng Diyos.

balik calendario

Oktubre 22
Miyerkules

Ika-29 na Linggo ng Taon

Unang Pagbasa: Ef 3:2-12
Ebanghelyo: Lc 12:39-48

Sinabi ni Jesus sa kanyang mga alagad, "Isipin ninyo ito: kung nalaman lamang ng may-ari ng bahay kung anong oras ng gabi ang dating ng magnanakaw, hindi sana niya pababayaang looban ang kanyang bahay. Kaya maging handa kayo sapagkat dumarating ang Anak ng Tao sa oras na hindi ninyo inaakala."
Sinabi ni Pedro: "Panginoon, kanino mo ba sinasabi ang talinhagang ito, sa amin o sa lahat?" Sumagot ang Panginoon: "Isipin ninyo ito: may tapat at matalinong katiwala na pangangasiwain ng panginoon sa kanyang mga tauhan para bigyan sila ng rasyon sa tamang oras. Kung sa pagdating ng kanyang panginoon ay matagpuan siya nitong tumutupad nang gayon, mapalad ang lingkod na iyon. Talagang sinasabi ko sa inyo, pangangasiwain siya nito sa lahat nitong ari-arian. Ngunit maaari namang maisip ng lingkod na iyon: 'Matatagalan pang dumating ang panginoon ko' at simulang pagmalupitan ang mga utusang lalaki at babae, at kumain, uminom at maglasing. Ngunit darating ang panginoon ng lingkod na iyon sa araw na di niya inaasahan at sa oras na di niya nalalaman. Palalayasin niya ang katulong na ito at pakikitunguhang gaya ng mga di-tapat.
"Maraming hampas ang tatanggapin ng katulong na nakaaalam sa kalooban ng kanyang panginoon pero hindi naghanda ni sumunod sa kalooban niya. Kaunti lang naman ang tatanggapin ng walang nalalaman sa kalooban niya ngunit gumawa ng mga bagay na dapat parusahan. Hihingan nga ng marami ang binigyan ng marami at hihingan nang higit ang pinagkatiwalaan nang higit."

Pagninilay-nilay
Sa aking pagtuturo ng Ingles, natutuhan ko na pakikinig at pagbibigay-kapangyarihan sa mga estudyante ang kahulugan ng pagtuturo. Kaya sa aking klase, ang mga mag-aaral mismo ang nagpaplano ng kanilang klase dahil sila mismo ang natututo at hindi ang guro. Sila ang responsable sa kanilang pagkatuto at gabay lamang ako para samahan at patnubayan sila sa prosesong ito ng pagkatuto. Sila rin ang namamahala sa pang-araw-araw na takbo ng kanilang klase, at ako'y nasa tabi bilang "dalubhasang" puwedeng nilang konsultahin kung kailangan nila ng tulong. Ang kanilang mga pag-uusap at paggawa ang mabisang paraan para matuto sila ng Ingles.

balik calendario

Oktubre 23
Huwebes

Ika-29 na Linggo ng Taon
Juan ng Capistrano

Unang Pagbasa: Ef 3:14-21
Ebanghelyo: Lc 12:49-53

Sinabi ni Jesus sa kanyang mga alagad, "Dumating ako upang maghagis ng apoy sa lupa, at ganoon na lamang ang pagnanais kong magliyab na sana ito! Ngunit dapat akong mabinyagan ng isang binyag, at ganoon na lamang ang pagkabalisa ko hanggang di ito nagaganap! Akala ba ninyo'y dumating ako para magbigay ng kapayapaan sa lupa? Hindi, sinasabi ko sa inyo, kundi paghihiwa-hiwalay! Sapagkat mula ngayo'y magkakahati-hati ang limang nasa isang sambahayan, tatlo laban sa dalawa at dalawa laban sa tatlo; magkakahati-hati sila: ama laban sa anak na lalaki at anak na lalaki laban sa ama, ina laban sa anak na babae at anak na babae laban sa ina, biyenang babae laban sa kanyang manugang na babae at manugang na babae laban sa biyenang babae."

Pagninilay-nilay
Apoy ng maalab na pag-ibig ng Diyos ang agad nating naiisip pag nababasa natin o naririnig ang salitang "apoy." Madali rin natin itong iniuugnay sa parang dilang apoy na bumaba sa mga apostol sa pagpanaog ng Espiritu Santo. Kayat naiisip natin na pag-aalab ng damdamin para sa pagmamahal at paglilingkod sa Diyos ang hatid ng apoy.
Bukod sa init na hatid nito, tinutupok din ng apoy ang anuman. Nilalamon ng apoy ang lahat sa lagablab nito. Ito ang apoy na hatid ni Jesus sa ating buhay. Tinutupok, dinadalisay ng apoy, ang lahat sa ating buhay, na nagiging hadlang sa ganap nating pagsasadiyos.

balik calendario

Oktubre 24
Biyernes

Ika-29 na Linggo ng Taon
Antonio Maria Claret

Unang Pagbasa: Ef 4:1-6
Ebanghelyo: Lc 12:54-59

Sinabi ni Jesus sa mga tao: "Kapag nakita ninyong tumataas ang ulap sa kanluran, ka-agad ninyong sinasabi, 'Uulan,' at ganoon nga ang nangyayari. At kung umiihip naman ang hangin galing timog, sinasabi ninyong 'Magiging napakainit,' at nangyayari nga ito. Mga mapagkunwari! Nabibigyan ninyo ng kahulugan ang anyo ng lupa at langit pero bakit hindi ninyo sinusuri kung ano ang panahong ito?
"At bakit hindi kayo mismo ang makapagpasya kung ano ang tama? Sa pagpunta mo sa maykapangyarihan kasama ng kalaban mo, sikapin mong makipag-areglo sa kanya sa daan; baka iharap ka sa hukom, at ibigay ka naman ng hukom sa pulis para ipakulong sa bilangguan. Sinasabi ko sa iyo: hindi ka makalalabas doon hanggang hindi mo nababayaran ang kahuli-hulihang sentimo."

Pagninilay-nilay
Kasa-kasama ng kanyang ama si San Antonio Claret sa kanilang negosyo na paghahabi ng tela. Magaling siya hindi lamang sa pagnenegosyo kundi pati sa pagdidisenyo ng tela. Ngunit sa lahat ng ito, nakita niya kung ano ang kailangan sa kanyang panahon. Iniwan niya ang kanyang negosyo at nagpari, at dahil nakita niya na kailangan ang mga misyonero, nagsimula siyang magmisyon sa Espanya. At kasama ng lima pang pari, itinatag nila ang Konggregasyon ng mga Misyonerong Anak ng Kalinis-linisang Puso ni Maria, na kilala ngayong bilang mga Misyonerong Claretiano. Tulad ni San Antonio maging mulat din tayo sa mga tanda ng ating panahon ngayon.

balik calendario

Oktubre 25
Sabado

Ika-29 na Linggo ng Taon

Unang Pagbasa: Ef 4:7-16
Ebanghelyo: Lc 13:1-9

Dumating naman ang ilang tao na nagbalita kay Jesus ng nangyari sa Templo. Ipinapatay nga ni Pilato ang mga taga-Galilea at nahalo ang kanilang dugo sa mga handog nila.
Sinabi ni Jesus sa kanila: "Akala ba ninyo'y mas makasalanan ang mga taga-Galileang iyon kaysa lahat ng taga-Galilea dahil sila ang nagdusa? Hindi. At sinasabi ko sa inyo: kung hindi kayo magbabago, mapapahamak din kayong lahat.
"Gayon din naman sa namatay na labingwalong taong nabagsakan ng tore sa Siloe, sa akala ba ninyo'y mas may utang sila sa Diyos kaysa lahat ng naninirahan sa Jerusalem? Sinasabi ko: hindi, pero kung hindi kayo magbabago, mapapahamak din kayong lahat."
At sinabi ni Jesus ang talinhagang ito: "May taong may isang puno ng igos sa kanyang ubasan. At pumunta siya para maghanap ng mga bunga pero wala siyang nakita. Kaya sinabi niya sa nag-aalaga ng ubasan: 'Tatlong taon na akong pumaparito sa paghahanap ng mga bunga sa punong-igos na iyan at wala akong nakita. Putulin mo iyan at pampasikip lang sa lupa.' Ngunit sumagot sa kanya ang tauhan: 'Ginoo, pabayaan mo na siya ngayong taon. Maghuhukay ako sa paligid nito at lalagyan ng pataba. Baka sakaling mamunga siya ngunit kung hindi'y saka mo siya putulin."

Pagninilay-nilay
Hindi pa rin nawawala ang paniwala ng marami na pinaparusahan daw ng Diyos ang sinumang naghihirap sa buhay. Iniisip din nila na baka raw may kung anong panata sa Diyos na hindi nila tinupad kaya sila namomroblema sa buhay. Diyos ng kaparusahan pa rin ang tingin nila sa Diyos at hindi Amang mapagmahal at puspos ng pagmamagandang-loob.
Matiyaga tayong hinihintay ng Diyos at inaasahang mamumunga ayon sa kanyang kalooban. Sa halip na parusa, pag-aaruga at pag-unawa ang ibinibigay niya sa atin. Makita nawa natin ang alok na ito sa atin ng Diyos upang matanggap at mapakinabangan sa ating buhay.

balik calendario

Oktubre 26
Linggo

Ika-30 na Linggo ng Taon

Unang Pagbasa: Ex 22:20-26

Huwag mong pahirapan o apihin ang dayuhan sapagkat kayo man ay naging dayuhan din sa lupain ng Ehipto.
Huwag ninyong apihin ang biyuda o ulila. Sakaling apihin mo sila at dumaing sa akin, tiyak na pakikinggan ko sila, at mag-aapoy ang aking poot at papatayin kita sa tabak, at mabibiyuda rin ang iyong asawa at mauulila naman ang iyong mga anak.
Kung nagpautang ka ng pera sa aking bayan, sa dukhang kasama mo, huwag kang maging gaya ng usurero-huwag mo siyang patawan ng tubo.
Kung may inilit kang balabal, ibalik mo iyon paglubog ng araw, sapagkat iyon lamang ang pantakip niya sa kanyang katawan. Ano pa ang kanyang tutulugan? At kapag dumaing siya sa akin, pakikinggan ko siya sapagkat ako ay maawain.

Slm 18:2-3, 3-4, 47, 51
Iniibig kita, O Panginoong aking lakas.

Ikalawang Pagbasa: 1 Tes 1:5c-10

Hindi nga sa salita lamang ang pag-eebanghelyo namin sa inyo, kundi sa kapangyarihan, nang may banal na espiritu at marami pang ibang ibinigay sa inyo. Alam din ninyo kung paano namin kayo pinakitunguhan alang-alang na rin sa inyo.
At tinularan naman ninyo kami at ang Panginoon; pagkatanggap nga ninyo sa salita, nagtiis kayo ng pag-uusig nang may ligaya ng Espiritu Santo. At naging huwaran kayo para sa mga mananampalatayang nasa Macedonia at Acaya; sa inyo nagmula ang salita ng Panginoon sa Macedonia at Acaya, at sa ibayo pang mga lugar.
Lumaganap sa maraming lugar ang inyong pananampalataya sa Diyos at hindi na namin kailangang banggitin pa ito. Sila mismo ang nagsasabi kung paano ninyo kami tinanggap at kung paano ninyo tinalikuran ang mga diyus-diyusan para sa Panginoon. Pinaglilingkuran na nga ninyo ang buhay at tunay na Diyos, at hinihintay magbalik mula sa langit ang muli niyang binuhay na Anak-si Jesus na nagpalaya sa atin mula sa nakaambang kaparusahan.

Ebanghelyo: Mt 22:34-40

Narinig ng mga Pariseo na napatahimik ni Jesus ang mga Sadduseo, at sumang-ayon sila sa kanya. Kaya sinubukan siya ng isa sa kanila na isang guro ng Batas sa tanong na ito: "Guro, ano ang pinakamahalagang utos ng Batas?"
Sumagot si Jesus: "Mahalin mo ang Panginoon mong Diyos nang buo mong puso, nang buo mong kaluluwa at nang buo mong pag-iisip. Ito ang una at pinakamahalagang utos. Ngunit may ikalawa pa na tulad nito: Mahalin mo ang iyong kapwa gaya ng iyong sarili. Sa dalawang utos na ito nabubuod ang buong Batas at Mga Propeta."

Pagninilay-nilay
Dayo. Hindi katutubo kundi galing sa ibang lugar ang sinumang dayo. Iba siya sa mga taal na tagaroon kayat mas mahirap ang kalagayan niya sa buhay.
Alam ng marami sa atin kung gaano kahirap maging dayuhan sa ibang bayan. Milyong OFW ang nandarayuhan sa iba't ibang bansa sa buong mundo at patuloy na nagtitiis sa pagkawalay nila sa kanilang mga mahal sa buhay.
Dumayo rin sa ating mundo ang Diyos nang magpakatao si Jesus at nakipamayan sa piling natin. Tulad ng mga OFW, nagtiis din siya ng pangungulila. At sa pagdayo niya sa piling natin, iniwan niya sa atin ang dakilang aral ng pagmamahal sa Diyos at sa kapwa.

balik calendario

Oktubre 27
Lunes

Ika-30 na Linggo ng Taon

Unang Pagbasa: Ef 4:32-5:8
Ebanghelyo: Lc 13:10-17

Nagtuturo si Jesus sa isang sinagoga sa Araw ng Pahinga, at may isang babae roon. Labingwalong taon na siyang may espiritung nagbibigay-sakit; nagkakakandakuba na siya at di makatingala. Pagkakita sa kanya ni Jesus, tinawag siya nito at sinabi: "Babae, lumaya ka sa iyong sakit." Ipinatong nito sa kanya ang mga kamay at agad na nakatayo nang tuwid ang babae at nagpuri sa Diyos.
Nagalit ang pangulo ng sinagoga dahil nag-pagaling si Jesus sa Araw ng Pahinga kaya sinabi niya sa mga tao: "May anim na araw para magtrabaho kaya sa mga araw na iyon kayo pumarito para mapagaling, hindi sa Araw ng Pahinga!"
Sinagot siya ng Panginoon: "Mga mapagkunwari, hindi ba kinakalagan ng bawat isa sa inyo ang kanyang baka o asno mula sa sabsaban nito sa Araw ng Pahinga at inilalabas para painumin? At isang babae naman ang narito na anak ni Abraham na labingwalong taon nang iginapos ni Satanas. Di ba siya dapat kalagan sa Araw ng Pahinga?"
Napahiya ang lahat niyang kalaban pagkarinig sa kanya pero nagalak naman ang mga tao sa lahat ng kahanga-hangang ginagawa ni Jesus.

Pagninilay-nilay
Nilikha ang tao para makatayo tayo nang tuwid-ganito ang likas na kalagayan ni Adan sa Eden. Ngunit sa pagkakasala ng tao, nagiging baluktot siya. Pinapaging kuba siya ng kasalanang kusa niyang pinipiling pasanin. Sa pagdating ni Jesus, hangad niyang palayain ang tao sa mabigat niyang pasanin upang makatayo siyang muli ng tuwid.
Sa pagpapakatao ni Jesus, ibinabalik sa atin ang likas na dangal natin bilang mga taong malaya, marangal at makatatayo nang tuwid sa sarili nating mga paa. Ngunit marami pa rin hanggang ngayon ang sumasalungat dito dahil ayaw nilang mawalan ng kapangyarihan at pribilehiyo.

balik calendario

Oktubre 28
Martes

Ika-30 na Linggo ng Taon
Simon at Judas, mga Apostol

Unang Pagbasa: Ef 2:19-22
Ebanghelyo: Lc 6:12-16

Nang panahong iyon, umakyat si Jesus sa bundok para manalangin at magpalipas ng magdamag sa pagdarasal sa Diyos. Nang nag-umaga na, tinawag niya ang kanyang mga alagad at pumili siya ng labindalawa sa kanila na tinawag niyang apostol: si Simon na pinangalanan niyang Pedro, si Andres na kapatid nito; si Jaime, si Juan, si Felipe, si Bartolome, si Mateo, si Tomas, si Jaimeng anak ni Alfeo, si Simon na tinataguriang Zelota, si Judas na kamag-anak ni Jaime, at si Judas Iskariote na naging tagapagkanulo.

Pagninilay-nilay
Basahin mo uli ang Ebanghelyo sa araw na ito at pagsapit sa bahaging "si Judas na kamag-anak ni Jaime," isunod mo ang iyong pangalan bago mo patuloy na basahin, "at si Judas Iskariote na naging tagapagkanulo. Ulitin ang ganitong pagbasa.
Ano ang naramdaman mo? Mas malapit ka ba sa naunang labing-isang apostol o sa huli? Tinatawag ka rin at pinili ng Panginoon hindi lamang para maniwala at sumunod sa kanya kundi upang magpahayag ng Ebanghelyo sa pamamagitan ng gawa at salita. Hindi lamang ito pagsisimba kundi pamamahayag din ng Mabuting Balita ng Panginoon sa ating kapwa.

balik calendario

Oktubre 29
Miyerkules

Ika-30 na Linggo ng Taon

Unang Pagbasa: Ef 6:1-9
Ebanghelyo: Lc 13:22-30

Dumaan si Jesus sa mga lunsod at mga nayon, na nagangaral habang papunta siya sa Jerusalem. May nagtanong sa kanya: "Panginoon, kakaunti nga ba ang maliligtas?" At sinabi ni Jesus sa mga tao: "Magpumilit kayong pumasok sa makipot na pintuan sapagkat sinasabi ko sa inyo: marami ang gustong pumasok at di makapapasok. Kapag tumindig na ang may-ari ng bahay at naisara na ang pinto, tatayo kayo sa labas na kumakatok at magsasabing 'Panginoon, buksan mo kami.' Sasagot naman siya sa inyo: 'Hindi ko alam kung tagasaan kayo.'
"Kaya sasabihin ninyo: 'Kami ang kumain at uminom na kasalo mo, at sa aming mga lansangan ka nangaral.' Pero sasagutin niya kayo: 'Hindi ko alam kung tagasaan kayo. Lumayo sa akin, kayong mga gumagawa ng masama.' Naroon ang iyakan at pagngangalit ng mga ngipin pagkakita ninyo kina Abraham, Isaac, Jacob at sa lahat ng propeta sa kaharian ng Diyos, at ipagtatabuyan naman kayo sa labas. At makikisalo naman sa Kaharian ng Diyos ang mga darating mula sa silangan, kanluran, timog at hilaga. Oo, may mga huli ngayon na mauuna at may mga una na mahuhuli."

Pagninilay-nilay
Hindi sinasagot ni Jesus ang tanong kung marami ba o kakaunti lamang ang maliligtas. Nasa mga taong inaalok ng Diyos kung tatanggapin nila ang pagliligtas ng Diyos o hindi. Una niyang inialok ito sa bayang Israel ngunit sa kanilang pagtanggi, marami mula sa silangan, kanluran, timog at hilaga ang dumating at sila ang nagpaunlak sa kanyang paanyaya-ito ang Simbahan.
Ngayong nasa Simbahan tayo, na bagong sambayanan ng Diyos, huwag sanang mangyari na hanggang sa pangalan lamang ang ating pagsasadiyos. Kung magkakagayon, tiyak na may ibang mga darating mula sa silangan, kanluran, timog at hilaga upang sila ang pumasok at makisalo sa Kaharian ng Diyos.

balik calendario

Oktubre 30
Huwebes

Ika-30 na Linggo ng Taon

Unang Pagbasa: Ef 6:10-20
Ebanghelyo: Lc 13:31-35

Nang sandaling iyo'y dumating ang ilang Pariseo at binalaan siya: "Umalis ka rito at pumunta sa ibang lugar. Gusto kang ipapatay ni Herodes." Sinabi naman ni Jesus: "Puntahan ninyo ang musang na 'yon at sabihin sa kanya: 'Ngayon at bukas ay nagpapalayas ako ng mga demonyo at nagpapagaling at nasa ikatlong araw ang katapusan ko.' Subalit dapat akong maglakad ngayon, bukas at sa susunod na araw sapagkat hindi bagay na mamatay sa labas ng Jerusalem ang isang propeta.
"Jerusalem, Jerusalem! Pinapatay mo ang mga propeta at binabato ang mga sinugo sa iyo. Gaano kadalas kong ginustong tipunin ang iyong mga anak gaya ng pagyupyop ng inahin sa kanyang mga sisiw pero tumanggi ka nga. Ngayon, iiwanan ang inyong Bahay. Sinasabi ko nga sa inyo na hindi na ninyo ako makikita hanggang di sumasapit ang panahon na sabihin ninyo: Mapalad ang dumarating sa ngalan ng Panginoon."

Pagninilay-nilay
Sa unang sandaang taon ng pamayanang Kristiyano, marami sa mga alagad ang nag-alay ng kanilang buhay para sa pananampalataya. Sa halip na matakot sa harap ng kamatayan, buong tapang nilang ipinagtanggol at ipinaliwanag ang kanilang paniniwala sa harap ng mga nasa kapangyarihan. Pinakiusapan pa ng ilan ang ibang mga Kristiyano na huwag nilang hadlangan ang nalalapit nilang kamatayan dahil inialay na nila ang kanilang sarili tulad ng tinapay sa komunyon.
Panginoon, tapos na ang panahon ng pagpapakamartir sa gitna ng mga leon at mababangis na hayop ngunit bilang mga tagasunod mo, bigyan mo kami ng tatag at lakas ng loob na makapagpatotoo sa iyo.

balik calendario

Oktubre 31
Biyernes

Ika-30 na Linggo ng Taon

Unang Pagbasa: Fil 1:1-11
Ebanghelyo: Lc 14:1-6

Isang Araw ng Pahinga, pumasok si Jesus sa bahay ng isang pinuno ng mga Pariseo para kumain, at minamanmanan naman nila siya. Nasa harap niya roon ang isang taong minamanas kaya nagtanong si Jesus sa mga guro ng Batas at mga Pariseo: "Puwede bang magpagaling sa Araw ng Pahinga o hindi?" Hindi sila umimik kaya hinawakan ni Jesus ang maysakit, pinagaling ito at saka pinauwi.
Pagkatapos ay sinabi niya sa kanila: "Kung mahulog sa balon ang anak o ang baka ng isa sa inyo, di ba't agad niya itong iniaahon kahit na Araw ng Pahinga?" At hindi nila siya nasagot.

Pagninilay-nilay
Panginoon, ang kabutihan at kapakanan ng tao ang mahalaga sa iyo. Ito ang tunay na dahilan ng anumang kautusan. Wala sa pagsunod sa mga utos ang aming kaligtasan kundi nasa pagmamalasakit at pagmamahal sa aming kapwa.
Ano ang silbi ng aming pagtupad maging sa pinakamaliit na batas kung wala namang lugar sa aming mga puso para sa pinakamaliit at pinakaaba?
Turuan mo kami, Panginoon, na huwag paalipin sa mga batas at kautusan. Makita nawa namin sa totoo'y daan ang mga ito upang mamuhay kami nang malaya. Akayin mo kami sa daan ng pagpapakatao at pakikipagkapwa na siyang daan papunta sa Ama.

balik calendario

Copyright © 2008 by Claretian Publications
A division of Claretian Communications Foundation, Inc.
U.P. P.O. Box 4 Diliman, 1101 Quezon City, Philippines
Tel. (632) 921-3984 • Fax: (632) 921-7429 or 921-6205
Email: cci@claret.org